Travemünde .Netz - Das Travemünde Info Portal

Travemünde .Aktuell

Bi uns geiht de Sünn twee Stunn later up

Dat hele Johr weer al up den Ivendörper Barg rümbuddelt woorn. De niege Skandinavienkai wöör buut. De ool lang nich mehr ut. Dat segh dor ut, as wenn dor de Ünnereerdschen togang west weern. Nix bleev stah’n. De Pappelallee, de Flederbüsch, de Straat un de Iesenbahn müssen verswinnen. Grote Bargen vun Eer wöörn hin- un herschaven. De Ivendörper harrn Bang, dat dat hele Dörp toschüdd wöör. Groot Upregen weer mang de Lüüd. „Bi uns geiht de Sünn twee Stunn later up, so veel Eer schuuvt se uns vör de Döör!“ menen de Lüüd.

De Pappelallee

Dor güng een vun de wiesen Fruun to de Ünnereerdschen. „Weest man ni bang“ wisperten de Ünnereerdschen, „wi hebbt juch uns Hülp toseggt, wi passt up, dat de Buumaschinen kenen appeldwatschen Kraam maakt. Dat warrt mal en heel schönen Placken.“ Dat vertell de wiese Fru de Ivendörper. Aver so recht glöven kunnen de Ivendörper dat nich.

So veel Eer schuuvt se uns vör de Döör!

En Maand na den annern güng in’t Land. De Krach vun de Buumaschinen wöör ümmer leger. De Verkehr up de Iven-dörper Landstraat nehm ümmer mehr to. De nie Barg mit veel Eer wöör ümmer gröter. De Iesenbahn wöör dörch enen Bus ersett. Mennigeen fraag sik, mütt dat allens ween? Harr de ole Skandi nich utreckt?

Un wat dat allens kost. „Wenn dat mit den Barg so wieder geiht“ meen en vun de Ivendörper, „denn künnt wi naher up den Süüdhang Wien anbuun. Denn gifft dat bald Jvendörper Spätlese.“

Dor mellen sik wedder de Ünnereerdschen:“Weest man nich bang. To’n Harvst is de Barg trecht. Denn köönt juch altohoop up den Barg, un vun dor köönt juch wiet in’t Land kieken! Denn waart de Barg noch en Touristenatraktion!“

Sehg vun baben meist ut as so’n Speeltüügtog.

Un wohrhaftig, de Barg is nu trecht. Dat gifft Treppen na baven un’n Weg för de Fohrrööd. De Tog hett ünnen an’n Barg ok enen niegen Weg kregen. Un wat dat vun dor baven en fiene Utsicht is. De Barg is an de veertig Meter hoch. Tramünn, de Oostsee un de hele Landschap ründüm liegt to dien Fööt.

Wi hebbt annerletzt en Fohrradtour na den nien Ivendörper Barg maakt. De Sünn schien vun blagen Himmel. Dat weer so’n richtig schönen Harvstdag. De Barg weer so steil, dat wi vun’t Rad afstiegen müssen. Ganz ut de Pust kemen wie baven an. Wi hebbt uns in’t Gras sett. Dat eerst wat ik meen: „Hier mütt en Bank her“. As wi uns n’beten verhalt harrn, hebbt wi de herrliche Utsicht genoten. De Oostsee weer düüsterblaag un de groten Scheep lüchen in herrlichen Sünnenschien. De ool Tramünner Lüchtturm schien bannig lütt neven dat hoge Maritim. De Kirchturm mang de velen lütten Hüser weer goot uttomaken. Dat weer en wunnerboren Anblick. Nu keem dor ok noch en Tog an. De kroop as en rode Raup up de niege Trass lang. Sehg vun baben meist ut as so’n Speeltüügtog.

En herrlich Rodelbahn

Dor meen ik, ik höör en lies Stimm wispern: „Hebbt wi juch toveel verspraken? Süht dat nich al goot ut?“ Dat weer seker wedder de Stimm vun en Ünnereerdschen. Dor heff ik ganz liesen antert:“Nu helpt man ok noch, dat hier en lütt Gaststeed för wat to Drinken herkümmt.

Mutt nich so groot sien as de Spion oder dat Spelunkenkaffee, wie’t ok ümmer heten hett. Dat is doch afreten woorn. “Mien Mann schüttel mit den Kopp. „Wat du al wedder för Grappen in’n Kopp hest.“

Up den Nahuusweg, dat güng ümmer herrlich bargdaal, meen mien Mann: “Dat is hier meist wie up de Alm. Wenn dat in’n Winter Snee gifft, is dat hier en herrlich Rodelbahn!“ Bi uns heet sietdem de nie Ivendörper Barg de „Ivendörper Alm“. Wi köönt jüm blots vertellen, dat lohnt sik, den Upstieg up de Ivendörper Alm mal to wagen.

Thea